EN
MT
L-Assoċjazzjoni Medika ta' Malta (MAM) ikkundannat in-nuqqasijiet regolatorji li ħallew l-hekk imsejħa International European University (IEU) topera f'Malta, u ħallew mijiet ta' studenti barranin mitluqa, bla flus, u bil-futur tagħhom imħarbat.
Il-MAM qed iżżomm lill- Awtorità Maltija għall-Edukazzjoni Ulterjuri u Għolja (MFHEA) direttament responsabbli għal dak li tiddeskrivi bħala “nuqqas gravi ta' sorveljanza.”
“L-edukazzjoni medika mhijiex prodott kummerċjali. Dan l-iskandlu qered ħajjiet, sfrutta studenti vulnerabbli, u ħammeġ ir-reputazzjoni ta' Malta. Negliġenza regolatorja ta' din id-daqs ma tistax tiġi injorata,” qal il-President tal-MAM.
In-Nuqqasijiet Ewlenin Identifikati mill-MAM
- Liċenzjar Mhux Xieraq – L-IEU tħalliet tirrekluta studenti minkejja li ma kellhiex akkreditazzjoni xierqa, faċilitajiet kliniċi u standards akkademiċi.
- Twissijiet Injorati – Sinjali ta' periklu u lmenti ġew injorati sakemm il-kwistjoni ġiet sfurzata fil-beraħ.
- Reputazzjoni Mħammġa – L-applikazzjoni ta' Malta għar-Reġistru Ewropew tal-Assigurazzjoni tal-Kwalità (EQAR) ġiet miċħuda aktar kmieni din is-sena, minħabba nuqqas ta' trasparenza, akkreditazzjoni dgħajfa, u indħil politiku eċċessiv.
- Prattiki Predatorji – L-istudenti ġew żgwidati minn wegħdiet foloz u reklamar aggressiv.
It-Talbiet tal-MAM
- Inkjesta Pubblika Indipendenti dwar in-nuqqasijiet tal-MFHEA.
- Rimedji Immedjati għall-Istudenti: rimborż sħiħ tal-miżati, appoġġ għat-trasferiment, rikonoxximent tal-korsijiet validi, u assistenza psikoloġika.
- Riformi Sistemiċi: konsultazzjoni obbligatorja mal-Kunsill Mediku ta' Malta u ma' edukaturi mediċi kwalifikati; żjarat trasparenti fuq il-post qabel l-akkreditazzjoni; u żvelar sħiħ tal-fornituri kollha tal-edukazzjoni medika li joperaw f'Malta.
Ħdejn l-Istudenti
“Aħna ħdejn kull student li l-futur tiegħu ġie kompromess. Malta ma tistax tippermetti li istituzzjonijiet predatorji jisfruttaw it-tamiet tan-nies li jsiru tobba. L-istandards iridu jinżammu, l-istudenti jridu jiġu protetti, u l-kredibbiltà ta' Malta trid terġa' tinbena,” stqarret il-MAM.
Id-dikjarazzjoni sħiħa mehmuża : IKKLIKKJA HAWN